Case corenta persoas acudiron o pasado martes á xornada informativa organizada polo GALP Ría de Pontevedra no Auditorio do Edificio de Operacións Portuarias de Marín, nun acto celebrado en colaboración coa Autoridade Portuaria de Marín. A sesión tivo como obxectivo achegar ao tecido socioeconómico da zona todos os detalles da nova convocatoria de axudas ao abeiro das Estratexias de Desenvolvemento Local Participativo (EDLP), no marco do Fondo Europeo Marítimo de Pesca e de Acuicultura (FEMPA) 2021-2027.

O encontro congregou a persoas emprendedoras, empresas, entidades sen ánimo de lucro e colectivos vinculados ao mar para coñecer as oportunidades de financiamento dispoñibles para proxectos sostibles no territorio.

Cunha dotación total de 6.900.000 euros, esta nova convocatoria de axudas do GALP Ría de Pontevedra estará aberta ata o 16 de febreiro de 2026, e busca apoiar proxectos que contribúan á conservación dos recursos mariños, á valorización do patrimonio natural e cultural, así como á diversificación da economía nas zonas costeiras.

Durante a sesión, o equipo técnico do GALP explicou os criterios de acceso, as liñas prioritarias da convocatoria e os requisitos de presentación das solicitudes, ademais de ofrecer consellos prácticos para deseñar proxectos con impacto real no territorio. Tralo café, as persoas asistentes tiveron a oportunidade de resolver dúbidas específicas e compartir experiencias con outras entidades interesadas.